சிறந்த இளம் எழுத்தாளர்களை கவுரவிக்கும் வகையில், ஹரியானா மாநிலம் குர்கானில் ஆண்டு தோறும் விருது வழங்கப்படும். அங்குள்ள எழுத்தாளர்கள், இலக்கியவாதிகளால் நாடு முழுவதும் உள்ள சிறந்த எழுத்தாளர்களுக்கு விருது வழங்கப்படுகிறது. இந்த ஆண்டு நடைபெற்ற நிகழ்ச்சியில், பல்வேறு தலைப்புகளின் கீழ் சிறந்த எழுத்தாளர்களுக்கு விருதுகள் வழங்கப்பட்டன.
கோவை மாநகராட்சி ஆணையரும், தனி அலுவலருமான டாக்டர்.க.விஜயகார்த்திகேயனுக்கு மிகவும் எழுச்சியூட்டும் எழுத்தாளர் (மோஸ்ட் இன்ஸ்பையரிங் ஆத்தர் 2018) விருது வழங்கப்பட்டது. அவர் எழுதி அண்மையில் வெளியான ‘ஒன்ஸ் அப்பான் அன் ஐ.ஏ.எஸ் எக்ஸாம்’ என்ற புத்தகம் இணையதளம் மூலம் அதிக அளவில் விற்பனையாகியுள்ளது.
குடிமைப்பணி தேர்வுக்காக தயாராகிக் கொண்டிருக்கும் ஓர் இளைஞனின் வாழ்க்கையை கூறும் இந்த புத்தகம், வாசகர்கள் மத்தியில் நல்ல வரவேற்பைப் பெற்ற நிலையில், இந்த நூலை எழுதிய விஜயகார்த்திகேயனுக்கு இந்த விருது வழங்கப்பட்டுள்ளது.
கோவை மாநகராட்சி ஆணையருக்கு “மிகவும் எழுச்சியூட்டும் எழுத்தாளர்” விருது
